Resumen

Emakume etorkin musulmanen errealitatera hurbiltzeko lana dugu hau eta zehazki feminismo islamikoaren begirada hartuta abiapuntutzat. Hau beharrezkoa da euren bizitza testuingurua modu egokiago batean ulertu ahal izateko, haiek biktima bezala ikustetik subjektu bezala ikustera pasatzeko eta orokorrean, beraien aldarrikapenak hobeto ulertu eta aintzat hartzeko. Zentzu honetan, lanak kolektibo honen taldekatzea edo elkartegintza ezagutzera bideratuta dago: haien printzipioak eta helburuak, feminismoaren inguruko hausnarketak, haientzat migrazio prozesuak dituen onurak eta zailtasunak zeintzuk diren eta instituzioekin dauzkaten harremanak ikusiz. Lana testuinguru hurbilean egongo da kokatuta, Euskadi mailan hain zuzen, muga geografiko honek landa lana burutzeko aukera gertuena eskaintzen baitu.

Eusko Jaurlaritzak Euskadiko etorkin musulmanei buruz egindako ikerketa batean (2010), talde heterogeneoa osatzen dutela ikusi zen, ez bakarrik zentzu etniko eta kulturalean, baizik eta erlijioarekiko duten ikuspegiari dagokionez ere. Etorkinak lau kategoriatan bereizten ziren: musulman sinestun eta praktikanteak, musulman sinestun baina ez praktikanteak, duela gutxi Islamera bihurtutakoak eta musulman laikoak. Lan honetan emakume migratzaile musulmanez ari garenean, lehenengo bi taldeak interesatzen zaizkigu, hots, islamarekin identifikatzen diren emakumeak praktikanteak izan ala ez. Neurri batean, bihurtutako emakumeen diskurtsoa aztertuko da ere, emakume musulmanen ahalduntzean eta kontzeptu tradizionalak kolokan jartze prozesuan, emakume hauek rol garrantzitsua jokatu baitute (Etxeberria, Ruiz eta Vicente, 2007: 34).